咪以為男仔先識嵌車砌車，女仔一樣掂，換零件、裝避震，女仔對爬山單車的零件一樣如數家珍。三個女仔，六隻手，4分鐘內嵌好一部爬山單車，玩埋衝樓梯、凌空跳都得，以後唔好小看女仔。
記者：馬靜兒
攝影：陳陶鈞
踩車結緣
Elaine、Eva和LittleGirl本來互不相識，但都因單車結緣。本來大家都只是各自玩車，平日晚上都在沙田一帶玩，跟其他玩單車的男仔碰面，大家經常傾吓最新的單車情報，邊個牌子的軨盒靚啲，邊個避震好啲，傾吓講吓就變成朋友，幾乎晚晚都一齊玩車。但大家都慨歎：「我哋只係想玩單車，但香港都無地方，即使喺單車徑玩都經常被途人挑釁。夜晚嚟玩，都係唔想阻礙其他行人，但一樣好似過街老鼠，成日俾人趕！」不過，每年都有不少單車比賽，證明玩單車都是健康運動，才有推動力繼續玩單車。
嵌車實錄
有理論都要有實踐，最實際的方法，將整架單車拆散，叫三人嵌回原形。
唔踩瞓唔着
男友一向玩爬山單車，一次替Elaine裝嵌了一部，她就開始玩單車了。有空就到單車舖，看人家維修、裝嵌零件，見人唧油，就問點解，由唔識問到識。為了省錢，她便自己買二手零件裝嵌，原本要萬二嘅單車，自己拆拆嵌嵌，結果用$6,000砌出一部單車。單車癮甚厲害的Elaine，每晚都要玩單車兩、三個鐘，「唔玩總係囉囉攣！」
Elaine
年齡：20歲
職業：文職
玩爬山單車年資：半年
現時座駕：CrossCountry自嵌價$6,000
砌車都要靚
外形嬌滴滴的Eva，雖然夜晚跟朋友一齊玩單車，但一樣穿絲襪，扮到靚靚，總之砌車都要靚。「平日一有錢就會買零件，將部車左改右改。有時都唔記得究竟自己花了幾多錢，總之幾乎所有人工都花在單車上，真的買單車零件多過買衫，好彩阿爸有資助。」Eva說她自己主要玩速度，花式較少練習，今次示範凌空跳起動作。
Eva
年齡：21歲
職業：秘書
玩爬山單車年資：1年
現時座駕：CrossCountry自嵌價$30,000
出院繼續跌
香港女仔玩單車一向好小心，最怕跌損手腳。但LittleGirl跟外國玩單車的女仔一樣毫不錫身，因為自己喜歡玩花式，平日練習難免受傷。有一次練習俯衝樓梯時，單車落地即炒，右手踭先着地，結果當然要入醫院。不過，屋企人都無阻止佢繼續玩。因為心癮大，明知衝樓梯易受傷，她一樣照玩，貪俯衝一刻最有快感。
LittleGirl
年齡：17歲
職業：電腦科學生
玩爬山單車年資：2年
現時座駕：FreeRide自嵌價$9,000
飛樓梯
由兩層高的樓梯飛出，以蜻蜓點水式在梯級上輕點三下即下地。
男生示範
