新機場：全港最大機舖1蚊鋪抵打！

荃灣悅來酒店商場經過舊年大翻新之後，商舖陸陸續續開門做生意。全港最大型嘅遊戲機中心亦喺今個禮拜進駐商場地庫，唔只機多，重要賣大包半價益大家。打機打到攰，重可以去隔籬TVat30食全港獨家北極蝦，今日就搵埋鍾意打機嘅Krusty試玩新Game，睇吓係咪真係咁抵！

記者：梁學文
攝影：周旭文

一入到去全港最大嘅遊戲機中心，鍾意打機嘅阿Jan同阿嵐經已忍唔住衝去玩最新嘅瑪利奧賽車。喂，唔好咁心急啦，你哋好似未「唱錢」喎。講到錢，呢度所有Game都係由$1起，最貴都係3蚊雞。好似喺外面玩緊$6鋪嘅《HouseoftheDeath4》，呢度只收$3一鋪。老闆保證𠵱家啲Game經已係定價，唔會之後加番。玩足一晚慳唔少，認真抵！有唔少人重登特搭車過來玩，就係貪佢平！

講得係全港最大嘅遊戲機中心，佔地16,800呎，一共可以擺到400台遊戲機，啱啱開張就擺住200台先，但已經係全港最多。大受歡迎嘅高達機喺呢度就有有成30台，而12台《頭文字D3》賽車機亦係全港最多（$1鋪），可以齊齊鍊番轉秋明山。不過呢度都唔係零缺點，因為位置係荃灣同大窩口地鐵站中間，交通唔係咁方便，之但係平咁多，行多兩步都抵番。講咗咁耐，Krusty應該唱好錢，跟住佢哋，睇下佢哋玩乜先。

亂槍打喪屍已經打到第4集，今集就改用一支機關槍打喪屍，而且畫面做得更細緻真實，阿嵐就最鍾意玩：「好刺激呀！畫面超真實，可以俾我發洩吓。」睇阿嵐邊玩邊大叫，就知佢玩得幾投入啦！

■「射佢射佢！」一開始兩個人已經好緊張。

瑪利奧賽車係呢度最新嘅賽車Game，以經典嘅瑪利奧人物做賽車手，各個主角都勁Cutie，啱晒女仔玩。難怪阿Jan同阿嵐玩到呱呱叫，兩個都大讚隻Game入面嘅人物好得意。

■以瑪利奧造型設計的賽車Game。

雖然出咗一段日子，但係唔識彈結他嘅阿Jan同阿嵐依然玩得津津樂道，唔通歌手玩樂器真係會投入啲？阿Jan：「我鍾意玩呢個Game，雖然本身唔識彈結他，但係跟住彈可以練到拍子。」

Krusty：鍾意打機，但平時開工玩PSP多，去邊度都帶住。

Jerry：呢度打機都係幾蚊雞，慳埋慳埋可以打多幾鋪。

Terry：出面啲機無呢度咁平咁多。

Edmond：我住喺彩虹邨都特登過來玩，最鍾意玩賽車Game，呢度$1、$2就玩到。

打完機有啲餓？商場入面有好多食肆，慳番啲打機錢就可以食餐勁！要數個場最有特色嘅，就係TVat30。以泰式食物為主，亦可以叫隔籬姊妹店嘅日式或者西式食物過來食。賣點係有得食全港獨家嘅北極蝦，蝦味比一般海蝦重。重有K比你無時限任唱，打完機食完飯，唱埋K就最盡興。提提大家，呢度唱K唔限時段，會收Nuts錢，但當然無果盤送。