記得小學時功課總要寫一篇「我的志願」，然後大家便會七嘴八舌地搶着說將來要做特首、做明星、做超人……雖則小朋友時候的志願可能只係隨口噏，但數十年後想起都總會令人緬懷一番，更是朋友聚會中的熱門話題，難怪《春田花花同學會》都要喺喜氣洋洋嘅新年檔期，同大家分享各人雄心勃勃嘅大志。街訪畢業無耐嘅同學仔，喂你講真定講笑，個個都想唔使做？
記者：黃若茵
插畫：梁海宙
《春田花花同學會》講乜？
劇情由送雞迎狗大除夕開始，講述當日發生咗一宗香港50年來大案件，賊人挾持大批人質，提出第一個要求：窩蛋牛肉飯！警方由此掌握線索，案件與即將舉行的「春田花花幼稚園50周年」有關。
回到當年，一班就讀於春田花花幼稚園的小朋友，幻想着屬於自己將來的理想職業，長大後的他們又會否如願呢？整套電影由38位中、港、台、韓紅星真人演繹，並與動畫穿插，故事劇情方面更加入了槍戰等的大場面，緊湊認真得來保留了麥兜式的童真惹笑。斬燒味、煮咖啡、開會發謬論等等，都是劇中角色的志願，雖似幼稚，卻是簡單快樂。
畢業組：愛不勞而獲？
右邊小朋友嘅志願，又醫生又護士，好正路。又聽吓畢咗業嘅新一代點講？咦，點解又中六合彩又想做乞兒唔使開工嘅？
中六合彩
Johnny：「細個睇過《富貴逼人》系列嘅電影後，中六合彩就係我嘅志願。
乞兒唔使做
Be：「細個嘅時候想做乞兒，坐喺度乜都唔使做就有錢收。」
做怪獸蝦女仔
Ken：「想做征服地球嘅怪獸，因為可以欺負可愛嘅女仔。」
想做魚蛋妹
Hinnie（左）：「好鍾意食魚蛋，所以想開檔賣魚蛋。」
Yoko（右）：「想做飛機師，女仔揸飛機好威風有型。」
明星組齊MatchUp
十個人講咗我的志願，九個講咗就算。除非你學啲港姐咁講：志願係「成功人士」啦（即係做乜都得）！明星小時候志願一樣係乜都有，以下有幾位，不如睇志願估吓佢哋係邊個？
答案：
A=林二汶
B=葉璇
C=傅明憲
D=楊思琦
戲中演員乜志願？
麥兜
我的志願：秘密！唔話你知
原因：睇完套戲你就會知㗎喇
點達成：都話係秘密咯！
陳慧琳
劇中志願：蜑家婆
真實志願：警察
原因：睇《新紮師兄》覺得梁朝偉好型。
點達成：冇機會，拍咗《大事件》一片都可以話達成咗個心願。
Miki
劇中志願：外賣妹
真實志願：老師
原因：又有好多假放！
點達成：冇呀，呢個志願好快就消失咗。
林一峰
劇中志願：廚房打雜
真實志願：巴士路線設計員
原因：天生巴士迷，鍾意遊巴士河
點達成：拿玩具巴士於家中駛來駛去，並為家中的角落命名，設計巴士路線。
黃又南
劇中志願：畢業生
真實志願：賽車手
原因：由細到大都喜歡車，睇過賽車的卡通片後有當賽車手的念頭。
點達成：跟朋友一起到珠海賽車場玩車。
何超儀
劇中志願：OL
真實志願：做歌手
原因：愛唱歌，有表演慾
點達成：由細到大都有參加合唱團，聖詩以至民歌都會唱。
