食環處:<br>利嘉兒至愛漢堡包B仔都搶

食環處:
利嘉兒至愛漢堡包B仔都搶

利嘉兒(Lily)最近忙緊拍無記新劇《鳳凰四重奏》(暫名),時間長又無啖好食,難得有時間,重唔即刻飛去婚前住足3年的娘家跑馬地食至愛的Owner'sBurger咩?「搵明星推介就一定好食㗎喇?」咁加多個天真無邪嘅小朋友又點睇?採訪當日忽然有外籍小朋友Bella入鏡,唔係博上鏡,而係抵受唔住嚟搶食咋!
記者:陳慧茵
攝影:陳盛臣

逢周六日帶狗識朋友

英式酒吧「TheJockey」最吸引之處係提供開揚的「DogsWelcome」露天座位,方便人客攜狗入場,Lily愛狗如命,有鼻敏感嘅丈夫周國豐娶得佢,第一樣要遷就嘅就係同佢隻寶貝狗仔豆豆打成一片,包括去「TheJockey」歎番個靚Tea:「每逢星期六、日,好多人都會帶埋佢哋嘅狗仔嚟呢度食嘢傾偈,平日返工無乜時間陪豆豆,所以一有時間都會帶佢嚟識吓朋友仔。」露天座位貼近大街,難得身為公眾人物的Lily完全唔介意。每日黃昏,不少老外都會光臨幫襯,皆因呢度提供到市面少見的英國樽裝啤酒,以為Lily久唔久都會飲番一支半支LondonPride、OldSpeckledHen或者AbbotAle,點知佢話:「我同老公都係一飲酒就會面紅嗰種人,可樂我就會飲,以前一日可以飲五、六罐㗎!」

■用粉筆喺黑板上寫上每日例湯,好有英倫小酒吧Feel。

■店如其名,室內掛上大量騎師相,襯番隔籬快活谷馬場。

■外形似十足街燈的暖爐,冬天開着佢,就算坐室外都唔怕凍。

好Juicy!Owner'sBurger$78

Lily婚前獨居跑馬地,最懷念爸爸每次探佢都會買個漢堡包畀佢食,可惜間舖已經結業,好彩呢度最出名的Owner'sBurger都唔弱,選用西冷牛扒,極Juicy。

FishandChips$109

價錢偏貴,但份量都KingSize,表面炸至薄而脆,魚柳有齊3種自製醬汁跟碟上,其中蒜茸蛋黃醬帶濃香蒜味,最受歡迎。

酥皮湯?No啦!StickandBeerPie$92

霎眼睇以為係酥皮湯,其實係用3種啤酒燜成的牛肉批,將酥皮蘸點牛肉汁同吃更滋味。

AppleTart$42

推介必食,面層的青蘋果酸甜醒胃,最正係撻皮非常香脆鬆軟,Lily都食到唔停口。

食客有Say

TheJockey(25722266)
地址:跑馬地黃泥涌道33號地下
營業時間:平日3:00pm-2:00am,公眾假期12:00nn-2:00am

Kerry:「每星期都嚟,我係澳洲人唔係英國人,但都坐得好有親切感。」

Michael:「漢堡份量夠大,味道好好,我成日帶埋囡囡嚟。」

Gordon:「食物水準幾高,份量夠大,係略嫌價錢貴咗少少。」