被譽為改機天王嘅「謝利記」（Jerry），有人當佢神咁拜，亦有人視之為大敵，喺手機呢行，幾乎冇人唔識！加上近期有傳海關正調查改機是否屬侵權行為，並搜查其旺角辦公室，於是人氣更急劇上升！事後Jerry對此表現得一臉無奈，只強調話：「當每次成功破解一部新機，嗰份滿足感喺其他地方都搵唔到！」呢件事仍在調查階段，但因為Jerry「愛玩」之故，已令到滿城風雨嘅日版機解鎖事件，更充滿話題性。
記者：陳國輝
攝影：陳盛臣
機神露兩手4分鐘拆機
除咗擅長改軟件，原來改硬件都好強！Jerry即場將802SE拆至體無完膚，過程唔使4分鐘！
「04年尾，802SE呢場仗真係好難打，佢令我轉變最大，簡直畢生難忘！」Jerry形容日版802SE（即行版SonyEricssonZ800）係一場硬仗，事緣係全港水貨佬並唔睇好呢隻機，認為水機市場有限，而且解鎖勁困難，冇人敢掂！
802SE全球首破最難忘
不過，當時Jerry就膽粗粗，搵埋幾個來自網站認識嘅業餘改機發燒友，一齊研究。搞咗幾個月，卒之成功破解！Jerry話，估唔到當時嚟解鎖嘅玩家多到排出走廊，就連水貨佬都要搵我幫手，嗰種滿足感實在難以形容！之後NewsGroup上更有網友登致謝詞㖭，佢講笑咁話：「嗰期真係以為自己變咗明星！」。除咗802SE、902SE兩單畢生忘難嘅事迹，佢第一部幫人改嘅SET68，到𠵱家仍然印象深刻！「嗰陣好多客都唔捨得放咗手上部T68，然後再買番部T68i，所以，佢哋全部都選擇將Version升級，話晒改一次Firmware只收$200度，總好過買新機啦！
珍藏過百迷戀B&O
自畢業後做文員開始，Jerry已慣常將成份糧嘅$7,000用晒買手機！由黎明代言嘅天地線，跟着蕉仔（Nokia8110），到本港都搵唔到嘅B&O手機，收藏品已過百部！Jerry還將Vodafone珍藏品放晒出嚟，連茶杯及摺扇都有，簡直迷戀成狂！咪以為謝利記乜機都肯改，有次客人帶部Ferrari版902SH畀佢改中文，點知竟拒接呢單生意！皆因佢最冧係Ferrari手機，覺得英文先原汁原味，改做中文就冇晒意思。啲客重以為佢黐線㖭！
響朵後出自家品牌
未幫客人改軟件時，謝利記最初以賣手機Cable為主。「04年嗰陣，有好多手機仍未支援紅外線同藍芽，所以我專攻賣接線等配件，可惜生意麻麻。」直至SET68推出，才轉型幫客人做升級。到舊年花咗三個月，成功向LG申請一張電池質量證書，正式以「JerryKee」品牌推出適合SHARP、SE及Nokia手機用嘅鋰電，都可算係「改邪歸正」喇！
機神小傳
Jerry讀文科出生，中五畢業後從事文職工作，自稱過着「日出而作，日入而息」嘅乏味生活，重一做就十年嗰隻！直至04年終告失業，後來嘗試幫人改機，喺旺角區經營謝利記，客路主要由熟人及一班網友介紹。04年尾，Jerry成功破解802SE，首次讓日版機可以喺香港使用，冇幾耐再破解埋902SH！因而被網友稱呼為全球最快嘅「解鎖佬」，全行冇人唔識得佢。
玩手機起家有辦睇
玩得精，原來有好多方面都能發展！好似以下兩位靠玩手機起家嘅人士，全部有各自特色！
范先生手機LED燈變揮春
自行利用手機LED燈製作26款不同類型嘅電子揮春，負責人范生經營賣手機及配件多年，自言首次將手機LED燈改成另一種用途，定單多達10萬隻，銷情理想。
陳先生手機Ringtone出雜誌
喺自編鈴聲時代，已經有人諗到出書，教用家入歌不求人。《手電&鈴聲》於01年推出第一期，當時正值手動入歌年代，深受年輕人鍾意；最近已轉為資訊主導。
