因為周圍問人捐助理大而自認為大乞兒嘅理大校長潘宗光下月就六十六歲，篤信佛教嘅佢噚日話，養生之道好簡單，就係盡量食齋，保持心境平和。潘校長嘅任期會喺○八年屆期，佢表明唔會續約，因為要留番啲時間研究儒、佛、道學問，同潘太享受生活。
理大噚日舉行長期服務獎頒獎禮，共有約三百名教職員獲獎，其中包括喺理大做咗十五年校長嘅潘宗光，由教資會主席林李翹如頒獎畀佢。潘校長話，咁多年冇乜大風波，反而對於有兩位好拍檔離世而好感慨，一名係九三年病逝、當年聘請佢嘅校董會主席張鑑泉，「理大九四年正名為大學，可惜佢睇唔到」；另一人係九八年過世嘅副校長周威彥，佢係潘校長港大讀書嘅師兄。
噚日獲獎嘅重有身兼全國人大嘅會計及金融學院副教授劉佩瓊，同埋呢排為傳媒解釋九鐵機件故障嘅機械工程學系工程師盧覺強，佢哋都喺理大做咗三十年。
傳真︰2623-9278
電郵︰[email protected]