今日澳門街將會好熱鬧，除英皇娛樂酒店（296）帶證券界及傳媒過去睇新酒店外，小賭王的新濠國際（200）亦喺澳門格蘭酒店搞新角子娛樂場開幕禮。
賭王噚日出嚟力撐兩個女主理的信德（242），重話仔女都一樣咁錫，如果新濠有着數，信德都一樣會有。既然賭王咁講，今日兩隻股可能雙翼齊飛。
濠賭股熱鬧，但內地彩票股重勁，華彩（8161）唞氣，又輪到中國蜂業（8156）同埋中民燃氣（681）炒上，真係一啲都唔輸蝕畀H股及紅籌股。
中糧重組有眉目
講起紅籌股，中糧國際（506）近排升幅雖然唔算細，但相比其他紅籌股則明顯遜色。經紀黃話，中糧傳咗好耐在新老總上場後會有重組，但一直都冇新消息，今次中糧炒起，主要受惠於旗下葡萄酒業務表現佳，受到芬佬追捧。
經紀黃又話，其實中糧重組的路向漸見清晰，據講公司會將商品如油脂生意同品牌生意如長城葡萄酒等分開，如果再有多啲消息公布，相信可為中糧股價再帶來刺激。
慕容小初