無綫新劇《鳳凰四重奏》噚日喺將軍澳電視廣播城錄影廠開鏡拜神，監製今次搞搞新意思，喺拜神之前請咗個大廚嚟整幾味賀年名貴小菜，一班演員佘詩曼、馬德鐘、陳鍵鋒、姚樂怡、康華、汪琳同楊英偉未入廠已經聞到香噴噴，個個見到一大煲炆鮑魚，即刻流晒口水，搵筷子搶住試味。之後監製大叫開始拜神儀式，但都冇乜人理佢，個個淨係掛住煲鮑魚，搞到監製好冇癮。
魔鬼鬥天使
阿佘話拍《鳳》劇拍到身心俱疲，好想快啲到農曆新年放吓假，加上佢媽媽返咗香港陪佢過年，阿佘話成十年冇同阿媽過年，所以想好好珍惜三日農曆新年假期，不過，嗰幾日又有廣告商以超過十萬蚊嘅酬勞誘阿佘返內地剪綵。
阿佘好矛盾咁話：「咁真係魔鬼同天使鬥爭，不過一去就兩日，咁難得我媽咪喺香港過年，雖然重未決定，但係我諗我多數揀做乖乖女陪媽咪！」
