許志安踏入娛圈近二十個年頭，當中有喜有悲，亦為他帶來許多值得紀念的東西，當中有五件雖然不是很貴重，但在安仔心中佔着重要位置，更是他在樂壇發展的原動力。五件珍藏品包括名牌衞衣、手表、獎座、鎖匙扣及演唱會護手肘套，當中以有二十年歷史的衞衣最珍貴，因為正代表其姊對他的愛及關懷。
親情無價衛衣
「我八六年入行，做歌手係我第一份工，家姐話做呢行要有件似樣嘅衫，重話送畀我㖭，最後我揀咗呢件，要成四百幾蚊，喺嗰時真係好貴，不過家姐話唔緊要。雖然我搬過三次屋，八六年之後冇再着過呢件衫，不過都一直好好保存住，到𠵱家拎番出來睇，都會覺得好溫暖。」
水怪紀念手表
「若有人用幾十萬嘅表嚟換我呢隻表，我就一定唔答應，隻表係家姐排咗一日隊，買嚟送畀我嘅，真係好有紀念價值。當時我好鍾意運動，呢隻Swatch表係紀念七二年喺奧運會連奪七個金牌嘅水怪史畢茲（MarkSpitz），佢嘅精神好值得學習。」
音樂獎增自信
「呢個地利亞修女紀念學校八五年歌唱比賽合唱組季軍，算係我第一個音樂上攞嘅獎。當年我唔夠膽自己報名，就叫埋個男同學陪我唱夏韶聲嘅《交叉點》，攞到季軍，冠亞軍係成班合唱團。呢個比賽令我知道自己都得㗎，後來先夠膽參加新秀。」
失而復得匙扣
「個鎖匙扣已經二十五年歷史，真係好有價值。嗰時我讀中一D班，代表學校參加區際籃球比賽得銅牌，呢次係我代表學校取得嘅第一個獎項，好有紀念價值，之前我重以為唔見咗，最近搬屋搵番出嚟，畀我好大驚喜，又勾起中學時期嘅回憶。」
爭住搶護肘套
「我舊年二月喺紅館開演唱會戴過嘅，嗰次係我第五次喺紅館開演唱會，相信要兩、三年後先有機會再開。呢對手肘套已經係第二對，原本只係做一對，點知尾場時俾人搶咗，其後因為要做巡迴演唱會先再訂做，我會特別珍惜呢一對。」
採訪：駱華齡
攝影：林德雄
