升岡國際主席劉錫康噚日請食飯，劉主席係邊個？咪馬王靚蝦王嘅馬主囉。劉錫康話不時都有去探望經已退役嘅靚蝦王，不過，可能𠵱家少咗見面，靚蝦王見到佢有啲陌生咁，重好似唔係幾認得主人㖭！靚蝦王𠵱家都十幾歲，記憶力退化都正常，人老咗都懵懵哋啦。
劉錫康又話，自從幫佢賺咗半億嘅靚蝦王退役之後，佢不斷購入新馬，𠵱家連埋同其他人夾份養嘅馬，總共有五匹，雖然暫時冇一隻好似靚蝦王咁威，但係最叻嗰隻都幫佢賺咗成四百幾萬獎金！佢話好馬真係可遇不可求，佢會繼續搵。
劉錫康講番當年佢帶靚蝦王去杜拜跑世界馬王大賽，曾經同杜拜國王握過手仔㖭！佢話杜拜國王好隨和，但身邊保鑣就好多。養馬養到同國王一齊玩，都真係幾威水。
傳真︰2623-9278
電郵︰[email protected]