華華早前講過，滙豐銀行大班鄭海泉會喺農曆年前搬新屋，做第一個入住山頂中峽道大班屋嘅華人大班，同煲呔曾入主禮賓府嘅話題性真係有得揮。噚日華華收到風，話鄭大班已經正式入咗伙，咁咪即刻上去中峽道行一轉，睇吓有冇咁好彩遇到鄭太。噚日成個香港都好大霧，以為山頂更加濕，點知唔止無霧氣，重見到陽光唔錯，可能係間屋偏南啩，咁好風水，相信鄭大班一家應該住得好舒服。
記得上一次做不速之客時，屋內屋外沙塵滾滾，聽到叮叮噹噹嘅裝修聲，今次就見到大屋二樓有兩個菲傭整理緊啲被鋪，而間屋嘅保安亦明顯嚴密咗，大閘旁邊已經有「實Q」守住（上次冇㗎）。華華喺門口落車望咗兩望，就已經有人嚟查問嘞！但係同上次一樣，最終都見唔到鄭大班或鄭太，惟有喺度恭祝佢哋「喬遷之喜」啦！
李華華