入廟拜神，入屋叫人，拜年當然要「𢱑」銀；每年新正頭「𢱑」遍眾親朋戚友屋企，但講到最啱自己口味，必屬自家那個，無他，隨手拿來有得食（偷食嗰隻！），必定揀到至合心水。若家陣還未有頭緒？呢度有兩個現成Sample，由袁彩雲親自操刀，一個中式傳統，一個專攻新式零食，一式兩款隨你揀！
記者：招佩珊
攝影：伍慶泉
傳統之選 第一時間執金
袁彩雲近年主持唔少飲食節目，又喜歡走入廚房煮番幾味，她剛剛出了第二本食書，近排又在公仔箱裏頭跟韜韜四出搵美食，與「食」關係密切，稱得上半個女食家，於是，搵彩雲執番個她的心水全盒。彩雲話每年家中全盒內的食品都是由她挑選，「傳統的瓜子糖果當然唔少得，但我亦會加添一些新派零食。」雖說現時貪方便可到超市買到賀年糖果，但彩雲還是喜歡幫襯老字號，「買瓜子、糖蓮子、角仔等傳統食品，始終是老字號有保證。」
店內大大話話都有幾十款糖果，初頭彩雲行了一轉，依然未有頭緒，但當她睇到金燦燦的金元寶，隨即開蓋一手插入大玻璃瓶內，將一大堆金元寶放入全盒內，「新年講意頭，放金代表有財嘛！」
1.脆口：開心果$40/磅（a）
果仁類之中她揀了開心果，取其「開開心心」好意頭，Size要夠大粒，肉要飽滿，最好試食，無油饐味就OK。
2.好意頭：金元寶朱古力$48/磅（a）
彩雲第一時間便拿一堆金元寶放入全盒內，她說「財源滾滾，金銀滿屋」，好意頭食品當然是必選。
3.經典：甄沾記椰子糖$40/磅（a）
彩雲小時候最喜歡食呢種糖，呢個牌子的椰子味最香，老牌子夠經典，碰巧店內有，二話不說即時放入全盒。
4.夠煙韌：芒果軟糖$36/磅（a）
糖類之中她鍾情軟糖，煙煙韌韌有得𡁻，啱小朋友，情侶食又夠晒煙韌，呢款軟糖芒果味香濃。
5.香甜：糖蓮子$36/磅（a）
彩雲話揀蓮子最緊要夠鬆化，買之前一定要試食，又香又甜又夠鬆咁就最Perfect。
6.必備：紅瓜子$72/斤（a）
瓜子一定揀紅色；老闆娘教路蘭州瓜子品質好，揀瓜子要大粒，桃紅色有光澤，肉甘香。
新派之選 嗒硬法式朱古力
來到另一間大型超市，大抵平日買慣材料，彩雲顯然相當熟路，左穿右插唔使15分鐘，已執了一籃食物，內裏全是她最愛的零食，首推好似魚蛋咁大粒的朱古力，還着記者一定要試，無獨有偶，在這個以零食居多的全盒內，同樣發現到軟糖的蹤影，原來，彩雲食糖愛軟唔愛硬，鍾意它煙煙韌韌、好好𡁻。
7.香濃：法國Truffles朱古力$22/80克（c）
彩雲至愛，整粒放入口，嘩，朱古力味濃到……加埋表層的朱古力粉，愛硬佢。
8.又係軟：Kasugai提子軟糖$21/135克（c）
又是軟糖？無計，彩雲對它情有獨鍾，她說提子味最穩陣，大小朋友都鍾意。
9.少少甜：Bolero檸檬威化條$12/110克（c）
「威化條我成日買，有朱古力、花生醬，呍呢拿等味，我最鍾意檸檬。」
10.健怡之選：VacavilleFruitCompany紅莓乾$45/340克（c）
全盒要加點健怡小吃才夠全面，「紅莓低脂低卡夠健康，最緊要揀天然生曬，無添加糖份。」
11.多口味：MunchiesClassicMix$24.5/262克（c）
一包有齊鹹脆餅圈、粟米片、芝士條及脆麥片，是彩雲的鹹食首選，「買一包食齊咁多小食，寓意樣樣齊嘛！」
12.軟腍腍：藍草莓棉花糖$15/100克（c）
再次證明彩雲愛軟唔愛硬，再揀多一款糖果，她選棉花糖，餡料揀了健怡的藍草莓味。
全盒以外 涼果老相好
上環呢間老字號涼果店，原來彩雲耐不耐都會來幫襯，隨口便數出她愛吃的種類，如檸汁冬薑、話梅等；只在農曆年前供應的幸運欖，倒是首試，顏色紅噹噹又大粒，彩雲話啱晒新正頭。另再推介全盒以外的漏網正糖。
紅噹噹：幸運欖$50/400克（b）
幸運欖是店內特有，寓意「鴻運當頭」，只在農曆年發售，彩雲說欖味香濃，食落好似櫻桃，還即時想到新「煮」意用來伴Cocktail。
矜貴：燕窩糕$42/盒（b）
燕窩糕是店內招牌貨，在彩雲首本食書亦有介紹過，味淡不甜夠煙韌；採訪當日三點左右百多盒已被掃清！
限定品：化核蜜棗$28/450克（b）
好似粒牛丸咁大的蜜棗，要農曆年前才有得賣，皆因選用的金絲棗講時令，冬天最靚，入口清甜兼啖啖肉唔使吐核，忍不住一粒接一粒。
甜而不膩：合桃南棗$25/450克（b）
彩雲鍾意食軟糖貪其煙煙韌韌，於是記者推介呢款合桃南棗給她，試後她說：「唔會好甜膩，夠煙韌，而且好香棗味。」
必買涼果：檸汁冬薑$36/70克（b）
是她每次到陳意齋必買涼果，「好香㗎！」隨手遞給記者聞，果然，還未開封已嗅到檸檬香。
名人齊撐：茶泡$60/半磅（b）
一包有齊炸香的芋片、番薯片、花生和蠶豆混合而成的茶泡，是不可錯過的經典過年小吃，名人如發哥發嫂、陳方安生每年都幫襯。
他們忘不了的……
店舖資料
（a）么鳳（25762528）
銅鑼灣富明街3號地下
（b）陳意齋（25438414）
上環皇后大道中194號地下
（c）city'super（25062888）
銅鑼灣時代廣場地庫B1