啲議員一到新年就周圍去，貪玩嘅田少又點肯留喺香港？今年田少揀咗去法國北部滑雪；滑雪呢家嘢好考技術，一唔小心好易整親，所以田少前幾日「瞓嚟頸」，即刻去睇醫生。
田少兩公婆成日有影偕雙，去邊都孖公仔，但田太今次唔做跟得夫人，事關佢掛住湊孫，佢個囡囡同女婿都要留喺度照顧BB；好彩重有囝囝同新抱同行，亦有啲老死話join，令田少唔使做孤獨精。
以前唐唐未做財爺，都有同田少周圍去。今次呢？田少根本冇叫佢，因為唐唐貴人事忙，約親都去唔到；有時應承咗，只要煲呔有乜依郁，唐唐又要甩底，搞到好冇癮，唔預佢都啱㗎喇。
田少話離港前會向煲呔送上上海年糕做新年賀禮。查實以前都送開，唔關做唔做特首事；不過呢啲嘢，一向都係田太處理，田少唔太知詳情，但就好想問煲呔幾時請飲入伙酒，煲呔應該識做喇啩。唔知田少值唔值煲呔再開支比八二年Lafite更正嘅紅酒，大家摸酒杯底呢？
傳真︰2623-9278
電郵︰[email protected]