劉細良（圖）就快入中央政策組做官，民主派自然議論紛紛，有民主黨人突然問八方，究竟劉細良重係咪民主黨員，因為據佢老哥所知，細良喺當年少壯派同主流派開火之後，細良冇耐就唔再交黨費，但佢有冇正式退黨，就真係考起佢。
八方於是求教民主黨內一位資深同權威人士，究竟細良退咗黨未？佢就話，民主黨員要退黨係有一套退黨程序，例如要交退黨信，細良冇交黨費，但佢老哥一樣冇交過退黨信，換句話講，劉細良係一個欠交黨費嘅民主黨員。
若然細良唔交退黨信，煲呔就真係搵咗個民主黨員做智囊，呢個真係大突破喇！唔怪得有民建聯中人成日話，唔好再掛住嗌煲呔錫民建聯，佢哋只係有人做個特首特別助理，民主派就有成兩個友好大將坐鎮煲呔心戰室。
傳真︰2623-9278
電郵︰[email protected]