俗語有云，一山不能藏二虎。勢估唔到，煲呔剛𠱁掂俞宗怡更上層樓，去做問責局長，代王永平坐鎮公務員事務局呢個相等於中央組織部嘅重要部門，平叔位常秘、有官場靚太美譽嘅黎高穎怡又話要辭職唔撈，返歸唞唞兼去讀書進修。
肥龍愛將以退為進
咦，呢條橋當日肥龍契仔陳德霖都用過，呢頭向任總請辭，去美國讀咗幾個禮拜書就轉頭返港，加盟渣打做亞洲區主席。咁黎太又係肥龍愛將，莫非又係出此招數，以退為進？當然女人唔同男人，個老公有事業，養得起，真係可以隨時唔撈。
八方估，黎太未必同俞小姐唔啱，但係你要將佢調嚟調去，佢阿姐未必高興，俞小姐係公務員一姐，佢都係一太，結果佢唔肯跟平叔過檔去做工商及科技局局長嘅常秘，咪益咗蔡瑩璧冷手執個熱煎堆囉。
晉升叫停 激嬲煲呔
有人話，黎太舊年中已萌去意，只係最近先成事，咁舊年發生乜嘢事？如果冇記錯，就係當煲呔準備參選特首之際，爆出佢去信公務員晉升委員會，力保佢位前新聞秘書朱曼鈴由署理乙級政務主任升正。煲呔當然斷然否認，但係聽聞身為晉升委員會主席嘅黎太為免有人坐特快車，下令所有署理未滿一年嘅乙級政務主任，全部不入升職考慮之列。
自此之後，晉升委員會由新手袋黨把持嘅說法喺官場不脛而走，煲呔肯定看在眼裏，今次既然要大執位，就索性將忠心耿耿嘅黃灝玄調去公務員事務局做常秘，將晉升D8以下AO嘅主動權奪回。
官場點會唔講馬房，至於黃公公特首辦常秘個位，之前傳應耀康做，最後可能真係由黃公公舊部張瓊瑤頂上。蔡小姐新聞處長個位聽講未定人選，當年的確有人答應畀番新聞主任職系嘅人做，即係JulianaChen有機上位，但係煲呔好多考慮，唔知會唔會守承諾。
曾俊華局長舊曆年之後會調走，八方聽聞，臨走之前，佢同電訊管理局嘅區文浩答應咗小小超「舊愛」CSL，同班記者下星期一去海下實地考察，今次場大龍鳳由伍清華帶隊，希望旺一旺場。話說啲行山友成日話郊外收唔到電話，CSL於是喺西貢海下整咗個新機站，照顧吓廣大行山市民，真係德政。
傳真︰2623-9278
電郵︰[email protected]