唔少人中年發福，睇親醫生就會俾醫生贈幾句。賓架M就曾俾醫生鬧：「平時唔運動呀？」賓架M答：「打高爾夫球。」醫生話：「高爾夫球都叫做運動？行行企企啫喎。」賓架M為之苦笑。佢去過泰國打波，泰國乜都平過人，打波請兩個caddie，一個揸電車上到fairway揮棒開波，跟住又上番電車，另一個caddie孭球袋，賓架M打完十八個洞，都冇出過好多力。當然泰國特別寵壞人，但佢雖然不斷打波，身型就愈嚟愈肥。
鄭大班諗到一個減肥方法，就係買隻馬。左丁山俾佢嚇咗一跳，以為佢去澳洲買一隻馬，日日騎，可以減肥，但係返到香港就冇馬騎啦！大班話：「不可誤會，我係講電子馬，唐英年騎嗰隻。」聽講隻電子馬可以擺響客廳，一路睇電視一路騎，十五分鐘就會腳軟腰軟，持久落去就可以收肚皮收腰！」
咁好嘢？左丁山唔敢信住，一於等鄭大班親自試過，有效果嘞，就說佢買新Model，將隻舊馬折讓畀我！
與電器W傾起，佢話：「你唔好以為住豪宅啲人士先至買呢類產品呀，我哋周時做focusgroup，睇收貨人住址，希望搵出邊類客戶鍾意邊類產品。講出嚟你或者唔信，唔少公共屋邨居民買電動按摩椅！」咦，奇啲喎，電動按摩椅好阻地方，公共房屋面積細小，點擺放呀？電器W話：「啲客戶鍾意享受，平時將公屋內唔少雜物放在按摩椅上，要歎按摩嘞，就拎開啲雜物坐上去，情況與『朝行晚拆』相同。嗱，公屋居民購買力好強，兩萬四千蚊一個嘅超大雪櫃，有唔少送咗去公共屋邨。」
唔使供樓，用錢都豪氣啲。電器W話佢哋做生意，絕不先看衣裝，好多人嘅購買力唔係可以從衣着與住址睇出嚟嘅，總之乜嘢人行入嚟，都要好好招呼，兼個別產品送埋七年保養。咁咪送走唔少保養費？原來唔係，日本電器在七年內破爛嘅機率甚低，好多消費者（包括左丁山在內）從來都唔買保養嘅！