傳媒界近日消息非常多。除咗《信報》賣盤炒得㷫烚烚外，其他機構亦有嘢發生，今日同各位報告兩單新料。
《南早》噚日有人事變動，做咗十年嘅財經版老總SimonPritchand辭信，跟住馬上休假，話飛去滑雪。走得咁急當然未有人接班啦。原因？好似話大老細對有啲中國新聞唔係幾滿意，咁咪此地不留人囉。聽講，重有位女記者會一齊起身。
《星島》亦有料。話說佢哋賣咗九龍灣間大廈，之後租番嚟用，但現時已搵到大本營，會搬返去香港島。呢個消息，相信《星島》同業都會好開心。做報紙爭分奪秒，搬得遠好蝕底。
重有，講開《信報》，Tom仔同周凱旋小姐噚日發咗個聲明，話完全無意收購《信報》，自己冇、亦冇經第三者同對方直接或間接傾過咁話。咁強烈澄清，又幾值得細味。
傳真︰2623-9278
電郵︰[email protected]