香港女會計師公會（AWAHK）噚晚開Party慶祝個會正式成立，到賀嘅嘉賓過百人，當中唔少都係猛料女將，好似中聯辦副主任郭莉、中電阮蘇少湄（圖一左）、行會查史美倫（圖一中）、稅局劉麥懿明（圖一右）及立會范徐麗泰……三個女人一個墟，嗰度有幾多個墟不妨計計，總之場面好鬼熱鬧。
不過最搶鏡嘅唔係以上幾位，而係着到鬼火咁靚嘅副會長－－德勤嘅羅盛慕嫻，佢平時十分端莊，噚日因為要上台唱歌，所以揀咗套「登台」衫。羅太話個公會成立咗無耐，經費有限，咁自己跟老師學過幾年唱歌，所以班會友咪叫佢上台表演當慶祝囉！佢揀咗三首歌，國語、英文同西班牙文㖭。會計師都可以好藝術㗎！
程志遠攝
