近排真係好多未知數。九鐵點呀？唔知；西九點呀？唔知；港台點呀？唔知。
講吓港台先。日前撲咗去沙田參加楊子江先生個追思會。楊先生喺港台好有江湖地位，當日港台人馬自然出齊。我見到阿「是冗員」（施永遠個名用普通話講）周圍同人咬耳仔，講嘅就係新近出爐嘅委員會。講真，呢單嘢話唔煩就假嘅，之不過最緊要心平氣和講道理，唔好講歪理。乜嘢係歪理？記唔記得羅太當年話學生冇資格批評特首呀？講到好似老董俾錢咁，咁咪歪理囉。有人話政府俾錢，所以港台朱培慶（圖）佢哋要聽話。喂，政府錢我哋俾㗎，所以港台錢係我哋俾㗎。我哋話港台唔使聽話得唔得？我話得！你話呢？
一意孤行就大遊行
好，到西九。我聽過唔止一個地產財團嘅人講：「唓，俾我就唔玩。做乜呀，大嗱嗱攞三百億出嚟，跟住重要俾人鬧。」我就話政府開大，等人還價啫。其實呢單嘢問題出喺邊？就係一意孤行，人哋話前朝問題係決而不行。我話唔止。前朝問題係該做嘅決而不行，唔該做嘅，一意孤行。一意孤行，咁咪迫到大遊行囉。
重有呀，會行到腳仔痛㗎。
觀火
傳真︰2623-9278
電郵︰[email protected]