小小超李澤楷豪請大家玩半年3G，固然係城中熱話，但在財金圈，蘇澤光係咪留低喺8號仔先係大家最想八嘅。側聞蘇生份約係兩年生一年死，今年7月就夠鐘，佢同小小超傾成點無人知，但雙方都喺呢段敏感時間做嘢。
例如先排8號仔運動會，例牌乜嘢都唔出席嘅小小超罕有現身，成功宣示「主權」，等人記得佢先係老細。蘇生亦唔輸蝕，除咗幫政府搞吓電影發展，呢排8號仔大小事務佢都睇得非常肉緊，小至上星期now財經台搬新竇切燒豬、大至昨日同政府入境處簽電子護照張約，佢都親自操刀。咁都不特止，呢張價值以億元計的電子護照合約，重係由佢老哥親自出馬fight番嚟……照華華睇，呢啲就叫展現身價，就算過檔，多啲籌碼都好啲啦，係咪？！