浸大轉新嘅薪酬架構搞到班教授鬼殺咁嘈，噚日校長吳清輝企出嚟話校方唔係炒嗰六位教員，重好感性咁話浸大好似一條船，佢作為船長都唔想啲船員跳海，又話啲教員唔應該攬住張舊約，學校就「你死你賤」，希望佢哋為學校着想，回心轉意返嚟簽新約。
校長有校長講，一班浸大舊生就唔係咁睇，重打算星期五喺報紙登廣告，呼籲校方尊重工會權利，聽吓員工意見。
登廣告搞手係唔肯轉制新聞系助理教授杜耀明（圖左二）教過嘅舊生，𠵱家已經着手聯絡緊啲校友支持。杜教授咁多年嚟教出唔少好學生，今次恩師被迫走，唔知佢哋會唔會幫拖呢？
傳真︰2623-9278
電郵︰[email protected]