英國啲小報真係精采，整蠱知名人物嘅手段既大膽又細緻，更捨得用銀紙佈局，相形之下，只係識得用狗仔隊死跟名人嚟影相、偷拍，級數差好多。
睇《國際先驅論壇報》名記者RobHughes報道，世界新聞（NewsoftheWorld）請咗一位中東人MazherMahmood做「調查報道」編輯，以前扮過中東酋長，充大頭，令英國的皇侯貴冑跌落陷阱，狼狽不堪。今次Mahmood又扮杜拜酋長，虛稱對英超聯有興趣，想收買一隊球隊，搵英格蘭領隊艾歷臣做顧問。艾歷臣已經小心翼翼，收到邀請之後，問過律師，向英格蘭足總申請書面許可，先至去杜拜。
唉，酋長啲超豪遊艇吸引力十足，百試百靈，艾歷臣到咗杜拜，食好住好，上到豪華遊艇，見到Mahmood「酋長」，頂級香檳到肚之後，心理戒備冇晒，係咁講嘢，點知全部情況，俾《世界新聞》現場錄影，全文在一月十五日見報，死未。
艾歷臣對酋長講：（一）要買球會，阿士東維拉最好，球會主席（八十三歲），既老且病，容易傾；（二）我可以做領隊㗎，年薪三百萬鎊啫，不過要免稅噃，再加花紅，提前離開英格蘭隊，要賠五百萬鎊，你畀；（三）碧咸一定會跟我嘅，十七歲至七十歲女人都鍾意佢，淨係賣佢件波衫都有排收錢。碧咸對皇馬有啲失望㗎！（按：碧咸已與皇馬傾新約），（四）朗尼出身貧窮，來自貧民區，壞脾氣難改；（五）里奧費迪南有時幾懶吓；（六）奧雲其實唔係幾鍾意紐卡素，只係睇錢份上啫。
對外人爆咁多料，實在令佢啲王牌球員十分尷尬，可見艾歷臣之為人，除咗與女人偷歡之外，十分見錢開眼。經過呢次報道，你話朗尼、奧雲、碧咸、里奧費迪南對佢哋嘅領隊服唔服呢？講番《世界新聞報》呢位中東裔編輯，為咗保持神秘，報紙上佢嘅照片打晒格仔。嗱，下次有一位中東「酋長」請香港名人去杜拜傾生意，慎防中招。