上任房屋署署長冇耐嘅陳鎮源噚日第一次同傳媒會面，佢竟然話房署嘅生活比以前做新聞處處長舒服，好多行家都莫名其妙。八方都諗極唔明，房署要服務六十幾萬戶公屋居民，舒服得去邊？肥陳就話，以前做新聞處嗰陣，朝早六點九就要起身，又聽電台，又睇報紙，加埋要服侍一大班官，夜晚冇九點都唔走得。但係房署就唔同，有一班fit馬，好似譚榮邦同劉啟雄副署長咁幫得手。嘩，肥陳真係識講嘢。
肥陳雖然離開新聞處，但都念念不忘，八方問佢知唔知邊個頂Yvonne蔡做新處長？佢話乜消息都冇。原來蔡瑩璧做完WTO，就放大假去咗加拿大，年初九先返港，所以冇人搵到佢求證。官場中人話，蔡小姐可能要排吓隊先有D8做，但係最近的確有好多常秘位要填，好似黃灝玄咁，就可以揀跟周一嶽或者唔跟。
傳真︰2623-9278
電郵︰[email protected]