呔赴京請罪後，立定決心全面搞民生，唔理政治；佢近日正部署人馬，至於對外嘅公關同智囊，就靠晒佢老友鄭大班幫佢搵人兼埋班。唔怪得有人講笑，話大班已經由老董時期嘅「十點前特首」，榮升做「十點後特首」啦。
八方重聽聞，大班對外面啲人叫佢做「煲呔針」覺得好鬼委屈，其實佢好重要，應該係煲呔叫做「大班針」先至啱！佢兩個有幾熟？嗱，如果你有急事想搵煲呔，或者想知煲呔近日心情如何，最快同最有效嘅方法唔係搵黃公公或者陳羿，而係搵大班。呢條捷徑泛民嘅人都知道，全冇秘密。
影子特首落力組班
大班又真係唔話得，由特首辦新聞統籌專員到中央政策組（CPU）全職顧問嘅人選，都幫煲呔諗埋，十足係影子特首全部自己友，即如即將出台嘅新聞統籌專員何安達（Andy）同大班之友林旭華成日同撈同煲，一齊搞書節，又一齊接傳媒訓練生意嚟做，舊年Andy娶老婆，大班開心到不得了，同毓民跑上台做棟篤笑。
至於準備接練乙錚個位做中策組全職顧問嘅劉細良，𠵱家同李超人紅顏知己周凱旋打工，之前係大班馬仔，佢做《茶杯》周刊嘅老總，大班做社長，其實細良同八方都做過同事，因為佢都打過肥佬黎工。
八方聽聞，唔少老左對呢兩位阿哥都有睇法，話佢哋同民主黨千絲萬縷，怕佢哋偏心喎，加上佢兩個都係中大人，港大幫條氣亦唔係幾順。
講真，煲呔辦公室𠵱家都有唔少中大幫，好似特首辦常任秘書長黃灝玄、新聞秘書陳羿，同埋盛傳會入特首辦做特別助理嘅民建聯第二梯隊陳克勤；哈，畀個位佢莫非係為咗平衡吓老左條氣？
陳羿同陳克勤係中大政政系畢業生，兩個人都係關信基嘅門生，而關信基就係45條關注組創黨黨員。陳羿九四年畢業、陳克勤就係佢畢業嗰年先入讀中大，九七年讀完書就加入民建聯，師兄弟一場，怕且都會關照吓啩。
聽中大教職員講，陳克勤喺大學對國際政治興趣較大，唔係上好多關信基嘅堂，比較熟嗰位老師就係已經去咗加拿大教書嘅吳國光（即係趙紫陽嘅前智囊）喎。
傳真︰2623-9278
電郵︰[email protected]