單仲偕盞鬼幫禮賓府改名 - 李八方

  單仲偕盞鬼幫禮賓府改名 - 李八方

煲呔入主禮賓府,終於令呢個被人遺棄咗嘅古迹搵個好主人。可惜,禮賓府重未正名,禮賓禮賓,唔通話煲呔只係一個尊貴過客咩,所以好多人都有意見。好似泛聯盟劉秀成咁,佢當年都有份為港督府改名,問佢𠵱家使唔使再改?佢話梗係要啦,重話要英式啲㖭。
劉秀成同禮賓府原來好多淵源,早喺尤德、衞奕信做港督時代,劉秀成不時出入港督府,應邀出席啲高層宴會。佢最記得肥彭年代,話好鬼貪玩嘅肥彭不時請佢哋班專業人士去禮賓府開雞尾酒會,結果個個醉晒咁離開,咁就知道佢哋幾咁盡興。
一班民主派都贊成禮賓府改名,原來佢哋好支持改名做特首府,可惜煲呔唔鍾意,話苦苦聲;跟住佢哋就天馬行空,單仲偕好搞笑咁建議,不如叫特首中南海啦,橫掂煲呔都係香港領導人,點都要隆重其事先得。

傳真︰2623-9278
電郵︰[email protected]