何韻詩九六年奪第十五屆新秀冠軍而晉身樂壇，不經不覺已踏入第十個年頭。這十年阿詩經歷不少低潮，回想當初苦等五年才有機會出碟，竟遇上唱片公司關門大吉，可謂禍不單行，幸好得到師傅梅艷芳照顧，才能在樂壇逐步成長，日前更奪叱咤女歌手銀獎，總算吐氣揚眉。故她與讀者分享五件具紀念價值的物品時，便將梅姐所贈的手套列為頭號紀念品，地位超然。
☆暖入心手套
梅姐好照顧後輩，每次去旅行都會買手信畀我，去到邊買到邊，真係好有心。呢對毛毛手套係梅姐好多年前去歐洲旅行時買嘅手信，雖然香港天氣比較暖，冇乜機會用，加上我又怕整污糟，所以好少用，但佢代表梅姐對我嘅關懷。
我同梅姐嘅感情唔可以用說話去表達，佢喺我心中嘅地位亦冇人可以取代，𠵱家見到呢對手套，都會好似見到梅姐一樣。
☆響名堂曲譜
《光榮之家》呢首歌對我意義重大，因為係我參加完新秀後，隔咗五年至推出嘅第一張專輯，大家開始認識我亦係由《光榮之家》開始，所以好多謝作曲嘅蔡一智、填詞嘅黃偉文、同埋編曲嘅王雙駿，佢哋同我整咗一首咁正嘅歌，好多歌迷同我講都係因為呢隻歌而鍾意我，所以對我嚟講真係好有紀念價值，我重將呢首歌嘅樂譜keep到𠵱家，呢首歌亦係我第一隻識得用結他彈嘅歌。
☆梁祝紀念冊
好滿意去年嘅工作，最重要係做咗齣好成功嘅舞台劇《梁祝》，前前後後籌備咗大半年，同周國賢合作得好開心，台前幕後亦付出咗好多。呢本場刊就記載咗我哋嘅努力，我重記得尾場時大家都好唔捨得，喊到飛起，因為大家唔知幾時有機會再走埋一齊做戲，所以就當呢本場刊係紀念冊，我哋互相寫低做舞台劇時嘅感受，𠵱家睇番都好感觸同感動，另有一番滋味。
☆圖書伴成長
細個時好鍾意睇卡通書同兒童小說，內容到𠵱家重好印象深刻，以前我喺加拿大讀書，有好多呢啲書留喺嗰邊，有啲唔見咗，所以我會上網搵，見到合心水就bid咗佢。呢本《愛的教育──小徹的學校生活書》都係我bid返嚟，本書係講個小朋友嘅學校生活，雖然故事好平淡，但令我睇得好舒服，就算到𠵱家我重不時翻閱，因為裏面全部都係我童年時嘅回憶。
☆自作業MD
其實我自細就好鍾意音樂，有時重膽粗粗學人作曲，好希望有朝一日做隻一手包辦嘅大碟。我記得呢兩隻MD係屬於我早期嘅創作，當時重未有任何器材，亦都冇電腦幫助，要做demo就只靠一支結他同一部MD機，然後就喺屋企自彈自錄。不過以前寫落嚟嘅歌，好多都冇用過，記得入面有隻歌叫《無賴》，但就唔係鄭中基嗰隻，話唔定我𠵱家推出會勁過鄭中基嗰首。
採訪：駱華齡
攝影：葉君海
髮型：JimmyWhite&[email protected]
化妝：KrisWong
服裝提供：Peacockish
場地提供：...@Dog
