你可能會用──Junkfood、無風格、低水平
──嚟形容美式食物，就算你話食完會中「不瘦降」，我都會照食！因為我鍾意同班豬朋狗友柴娃娃搶食，鍾意啲食物大份到嚇死人嘅感覺，更鍾意大笑大叫都無人白鴿眼嘅Party氣氛，美式食物畀到我秒秒鐘歡聚歡笑，不知同我幾啱Feel，你呢？
記者：盧家蕙
攝影：伍慶泉
模特兒：Imageboys&girls（Salvador）
嘉露蓮甜心肋排中$158
肋排粗壯過你腳瓜，以特殊的切割方式保留精華部份，塗上原味烤肉醬，肉質鮮嫩好入味，甜絲絲的醬汁很誘人，骨肉分離的感覺，更令人難以忘懷，記得連骨都口噒埋呀。
索諾瑪沙律 $88
至怕食成擔沙律醬混入丁點蔬果的搵笨Salad，呢個重量級沙律就以新鮮雜菜為主，混青蘋果片、核桃、紅莓乾、藍芝士粒、紅酒醋醬油及香炸雞柳，餐前醒胃菜必食推介。
車打芝士三文治$78
意大利麵包內包鮮嫩西冷牛肉薄片、車打芝士及鮮番茄片，還有香脆洋葱配惹味燒烤醬，很不錯的Burger，我自問食得晒，不過女仔之家點都要扮細食，兩個人Share好了。
洋葱圈全磚$58半磚$38
又係洋葱圈？唔好喝倒采住，呢度嘅洋葱圈堆叠成磚塊狀，入口香脆多汁甜而不膩，如果得小貓兩三隻的話，食半座山好喇。
件件珍寶級份量
「TonyRoma's」美麗華商場同世貿中心分店先後關門大吉，以為佢全軍撤離香港之際，點知失驚無神喺時代廣場食通天重開，害我心噏咗一排。除例牌必有的肋排、炭烤肉類、烤雞、海鮮及美國人最愛的香酥洋葱磚外，由前菜至甜品都推出唔少全新菜式，淨係沙律已有8款，感覺更Fresh更多選擇；不過千變萬變，Jumbo級份量堅持不變，鍾意大大件質入口的食客大可放心！新店新裝修，以為美國餐廳裝潢一定勁有美國Feel，點知又大跌眼鏡喎，淺木色椅桌配帶有亞洲風味的格子木屏風，加上層層的薄紗簾，可增添私人空間，昏黃的燈光令格調更高雅，跟舊店的美式風格截然不同。
食客有Say
TonyRoma's（34212135）
地址：銅鑼灣時代廣場食通天12樓1207號舖
營業時間：11:30am-12:00mn
座位：110個
加入25款新菜式
「RubyTuesday」殺入香港近10年，尖沙嘴分店執笠，原來搬咗去九龍灣開其在港第3間分店，店舖主打Burger，開得分店自然又有新菜單啦，今次先加入超過25款在美國最受歡迎的新穎菜式，而且全都以迎合港人口味為大前提，聽講以後重陸續有來㖭！
香辣芝士漢堡$98
呢度嘅Burger最忠於美國口味，車打芝士、香濃惹味辣肉醬配Juicy牛仔肉，重係KingSize㖭，價錢算合理啦，久唔久豪番次唔過份啫。
超級拼盤$108
唔食過拼盤硬係周身唔聚財，拼盤包炸雞柳、炸蝦同炸芝士條，伴以蜜糖芥末、甜辣調味醬及香草番茄醬，一次過歎3種口味，啱晒多心嘅我。
芝士烤雞胸幼麵$158
意大利幼麵混入鮮嫩烤雞肉，再淋上美味濃郁芝士及香草番茄醬汁，伴以香脆蒜茸多士，味道討好，擺明迎合港人口味。
果仁朱古力新地$58
擱置減肥大計，香濃果仁朱古力蛋糕伴以呍呢拿雪糕，淋上朱古力醬，甜得來很窩心，食一次無所謂啦。
RubyTuesday（23763122）
座位：240個
地址︰九龍灣德福廣場平台P26號舖
營業時間︰11:00am-11:00pm