梁榮忠自從車震事件後，最近又有報道話佢媾鍾嘉欣，噚日忠仔喺電視城趕拍劇集《非常外母戇姑爺》，佢第一句就話唔想講，不停話講乜都冇用，寫出嚟嘅嘢都唔係真，又指佢𠝹鍾嘉欣單嘢假到無倫，最後重話要退出娛樂圈㖭。
忠仔話：「每次阿媽見我唔開心，就嚟安慰我，之後佢就喺度喊，我冇乜可以做，唯一可以做嘅係退出，一係就唔理。我想阿媽舒舒服服，唔好俾人問佢個仔點解咁賤。」
自認形象差
忠仔話考慮拍完《非》劇就退出，佢話：「真係好想問，我係咪真係可以用一個賤字嚟形容，事實根本唔係咁，除咗一件事係事實之外。」忠仔又話：「香港係可以唔識唱歌去唱歌，唔識做戲去做戲，但就唔可以有個形象唔好嘅人做呢行。」馮仁昭覺得做娛樂圈食得鹹魚抵得渴，忠仔係唔明呢個道理，抑或想博同情呢？