薄扶林貝沙灣一期一座高層C兩房單位，七百八呎，以五百七十五萬易手，每呎七千四。業主○四年以五百萬買入，揸兩年，件貨只升值一成半，賺得嗰七十五萬，相對大部份豪宅新盤，似乎落後咗啲。
美聯佘錦驊話，個單位只得些少海景，加上屋苑兩房戶升值潛力一向唔及大單位，就以啱啱成交嘅兩房戶為例，○三年一手價四百二十七萬，累積升幅唔夠三成半，相對同樣喺今個月易手嘅一期八座千七呎單位，作價逾千二萬，比○三年買入價七百二十萬，升幅逾七成。
同一屋苑大細單位，升值能力有咁大分別，所以話，千祈唔好跟風亂入市，做足功課冇蝕底。
電郵地址：[email protected]