又要辦年貨！自問身手敏捷的記者，要行三步退兩步力搏人潮才可擠入海味舖，果真墟冚！眼見大包小包的花膠、元貝，還有鮑、參、翅、肚……點揀好？還是搵專家教路最穩陣。家燕姐一向包辦買年貨，揀海味好有心得，第一件必入年貨係－－－蠔豉。今日重搵埋海味老行尊輝哥攞貼士，祝大家買得精明，食得豐足，齊齊過肥年！
記者：招佩珊
攝影：何家亮
例牌包辦年貨
好姨表示家中年貨都是由她一手包辦，過年當然要講意頭，「發財（髮菜）好事（蠔豉）梗係一定要有啦！」見她一手拿起大大隻的日本蠔豉，「靚蠔豉要身肥裙邊幼，大大隻上碟夠得體。」至於滋陰養顏的花膠，家燕姐平日都有買開，除了用來煲湯外，她更向記者教路，「將花膠、冬菇同薑切絲，加少少調味料煮好一兜擺喺雪櫃，隨時可以攞嚟食，撈飯或撈麵好正！女仔食多啲花膠好有益，皮膚都靚啲。」而鮑魚，她就會揀現成罐頭貨，「乾鮑又要浸又要發起，起碼要一、兩日，好花時間，家陣罐頭鮑啲質素都好好，一開罐就可以拎出嚟煮得。」尤其對於工作忙碌的家燕姐來說，的確方便！講到忙，家燕姐臨近新年前的檔期排得相當密密麻麻，拍劇、開會、處理業務……還有為新出的賀年唱片趕拍新歌MV，訪問結束時，她以新歌歌名《歡樂年年》祝大家新年快樂！
揀手秘笈
家燕入手 意頭孖寶
蠔豉身大裙邊幼
蠔豉大致來自中國及日本，前者應帶淺黃色，後者則帶青綠色為靚貨；身要肥，肚部切忌脹卜卜，肚脹代表內有卵即「起粉」，口感欠佳。
髮菜有天然草味
購買髮菜時要特別注意成餅髮菜要夠蓬鬆，手感粗糙，選購時不妨用手掹幾下，假髮菜會過份有彈性。好的髮菜該帶一陣天然草味，聞落是清新的而非帶海水的腥怪味。
專家教選擇竅門
26年海味老行尊輝哥
乾鮑腰圓背厚肥身
日本乾鮑最名貴，揀靚鮑要腰圓背厚，裙邊珠粒密而拮手，聞落有香乾鮑味。乾鮑身上有層薄粉，俗稱起粉，是正常的。
罐頭鮑魚印字噴罐有保證
現時很多罐頭鮑已用「噴罐」而非貼「招紙」，罐面要印有出產地、商標製造廠的編號、出廠日期、等級等資料。
魚翅要淨頭無白點
魚翅可分脊翅、翅片及勾翅（鯊尾）三種，當中以勾翅最豐滿最粗長，價錢亦最貴。揀翅要淨頭，即頭部（切割位）無骨、肉、皮連着。在燈照下，翅針要密，無白點。
魚肚忌花心
魚肚即花膠，有公（呈V形紋）乸（呈波浪紋）之分，以公的膠質較豐富，價錢貴過乸。揀花膠可放在燈下照，要「清水」透徹，無黑點或點影，切忌「花心」，要乾身、厚身、呈金黃色。
海參皮薄肉厚
揀白石參及禿參，以體形粗長、肉質肥厚皮薄為佳；揀刺參，則以刺針長及密，粗壯兼有香味。正常海參表面會有層薄粉，但不會像灰般跌落，若如降雪，小心是加工假貨。
元貝圓大紋幼
以日本北海道宗谷元貝最靚，紋理要幼細及少裂紋，聞落有鮮香味，色水金黃有光澤，圓大而結實。購買時，不妨試食小片，味道要自然、鮮味、無渣。
冬菇肉厚蒂短面有紋
日本冬菇最靚，食落夠滑，但亦較貴；靚菇底部應呈淺黃色，菇蒂短，身厚菇邊向內彎；聞落無酸味，靚菇面一定有花紋。
臘腸紅白分明
乾身不油膩，色鮮有光澤，不能過於豔紅，肥豬肉粒粒色白分明，表面要有皺紋，因為豬腸衣被曬後應收縮，若外表過份飽脹，可能是用了劣質的人造腸衣。
燕窩纖維愈密愈好
據《本草綱目》記載「燕窩大養肺陰，化痰止咳，補而能清，為調理虛勞之聖藥」。大致可分為燕盞、燕餅、燕條、燕碎等，價錢以形狀較完整的燕盞最貴，另還分白燕盞、黃燕盞及紅燕盞，論矜貴度，血燕是不二之選，其礦物質含量是眾燕窩之冠，補血效果最佳。
以挑選燕盞為例，形狀要完整及大片，呈半月形及兜狀窩形，略帶腥味，纖維密實而乾身，顏色白中帶灰或黃的屬正常，過份潔白可能經人工漂洗。官燕棧銷售及市務總監Bertha表示，燕窩形狀有別，但營養價值大致相同，可因應需要選購，如給小朋友吃，揀燕碎便合乎經濟原則；而燕盞雖較貴，但發頭大，與燕碎相比，用較少的乾燕窩盞便可浸發相同重量的燕窩，一絲絲的質感亦更具口感。
店舖資料
（a）安記海味（25446336）
上環急庇利街8號地下
（b）同興泰記海味（25472522）
上環德輔道西178-180號地下
（c）官燕棧（23906668）
旺角彌敦道610號荷李活商業中心18樓