新年又到，好多尊貴議員又密謀出外度歲。政府唔知係咪睇穿議員放假心態，林D9前日就側側膊推咗份策發會文件，馬丁睇完一肚氣，因為從字裏行間睇到，政府根本冇心推行普選。馬丁最唔滿意係連聯合國條文都扭曲埋，重好勞嘈咁話，如果政府繼續歪曲事實，唔排除向聯合國告狀。達仔都好嬲，話會去信策發會，叫佢解釋，點解將大家原本明白嘅普選概念，講到似是而非咁，如果個回應重係曲解普選，民主派一定會狂砌。
達仔等回應，單仲偕就先去旅行，單雞係民主黨經濟事務發言人，又真係好精打細算。原來早喺九個月前，佢就將儲到嘅飛行哩數，一次過換咗三張去峇里島嘅機票，等年廿八至年初三呢五日，可以同埋太太同細仔，一家大細出埠，慳番一萬幾千機票錢。
單雞離港，兩個肥仔，肥仔明同張宇人就話會留港消費，肥仔明過年期間，重會扮財神㖭。
傳真︰2623-9278
電郵︰[email protected]