港股噚日連續第3日下跌，今次調整，對大多數投資者而言，可謂如願以償，點解？升咗近千點，點會唔調整？回一回氣，大家都可以鬆一口氣，整固完成後，又會再升過。其實，今次回市，基本上都係受日股大跌所觸發。基本上，咁樣跌法，短線嘅獲利貨已消化得八八九九，只要游資重新入市，港股就會再大升。
港股市底其實好強，噚日日股最多曾下跌700點，而美國大公司業績亦未如理想，人人都預咗美股噚晚會大跌，但港股急挫一段後，已有力從低位反彈，恒指收市15481，跌94點。港股短期走勢仍會受外圍影響，但恒指在15300水平支持力應經得考驗（噚日低位在15376）。
中油（香港）（135）繼續逆市上升，最高見2.20元，收2.125元，升7.5仙，初步上升目標已達，可回吐，亦可以止賺位繼續持有。中石化（386）係大眾股民嘅財神，私有子公司行動一日未完，一日大派銀紙，儀征化纖（1033）搶上1.97元高收，大升8.8%；上海石化（338）再搶上3.80元收市，升3.4%，整固一日後，又再上過，以升破上升三角形的量度升幅計，短線目標係4.20元。不過，以石化股私有化作價平均為資產淨值的兩倍計，上石化的私有價有機會見到5字頭。
百仕達（1168）逆市回升，收2.425元，升3.2%，基金仍繼續收集，若升破2.525元阻力，可追進，短線可向前高位3元推進。
電力設備股接單滿瀉，未來幾年盈利已有保證，而且會有幾好增長，早前推介嘅哈爾濱動力（1133）噚日已逆市而升，收5.70元，升2.7%，旗形整固完成後，上升目標指向7字頭。
有機會追落後
東方電機（1072）噚日雖有大沽盤，但一樣有大行力接，由最低位8.10元掃番上8.50元收，反升0.10元。東電在月初突破長達4個月的複式頭肩底頸線阻力，家吓做緊後抽，升勢再起，目標將指向11元。
由去年10月底開始，東機的升勢比哈動落後，有機會追回失地。06年度（12月年結），預期東機每股盈利1.10港元，現價PE僅7.7倍，股價上升空間甚大。
郭兆誠