香港係國際城市，大約有5.5萬美國人住喺度，影響力都唔小。美國商會噚日介紹新任主席馬可寶畀傳媒，馬可寶同華華講，佢上任之後會即刻搞一個特別專責小組，研究點樣可以發揮影響力改善香港環境，同埋提高區內大眾嘅環保意識，令大家自願行動保護環境。
馬可寶話𠵱家香港嘅空氣污染已到咗幾嚴重階段，據佢所知，呢個問題經已成為海外公司在港設立總部嘅其中一個考慮；因為對佢哋嚟講，嚟唔嚟香港唔係淨係做生意咁簡單，重要幫一齊嚟嘅仔仔、囡囡同老婆打算。
不過佢又話番轉頭，雖然目前嘅空氣污染情況非常嚴峻，但係又未去到無得救嘅階段，叫華華唔使咁擔心，因為香港𠵱家仍然係外資進入內地最方便嘅大門，仍有一定優勢。不過，污染問題如果搞唔掂，就會削弱競爭力。佢都唔想見到「香港之死」係死喺污染手上。
有人問馬可寶點睇政府有意陰乾港台，佢話會方對呢件事冇任何立場，但新聞自由係香港賴以成功嘅基石之一，以前係，未來都會係。咁佢自己呢，當然重視新聞自由啦，因為佢正職係TurnerBroadcasting亞太區總裁兼董事總經理，區內嘅CNN新聞咪係佢管囉！
李華華