陳奕迅（Eason）下月的紅館個唱將加開兩場，昨日在排舞室開香檳慶祝，又即場表演踢躂舞。近期多位歌手在舞台上頻生意外，Eason笑言自己下盤穩重，不怕有意外發生。
陳奕迅昨日在尖沙嘴排舞室舉行記者會，宣布下月舉行的紅館個唱將加開十七、十八日兩場。Eason與經理人陳家瑛、邱王黎寬開香檳慶祝，又與組合EO2和彭敬慈大跳踢躂舞。
決不安歌
雖然早前有指Eason的個唱門票銷售情況不理想，但他一於少理，並說：「個個開演唱會都有呢啲傳聞，其實今次賣得都OK，我唔會理呢啲傳聞，傳聞歸傳聞，事實歸事實。」他透露個唱不會有安歌，改以大型歌舞謝幕，問到若歌迷不肯離場怎辦？他笑說：「咪坐到十二點，俾紅磡罰錢囉，我就走先。個騷兩個幾鐘，坐到patpat都麻痹啦！」
Eason即場表演一節踢躂舞，十分精采，原來其練舞過程相當辛苦，他說：「我今次會畀最好嘅嘢觀眾睇，演唱會我會苦練唔同嘅舞步，跳舞會比以前好好多，最後重會有大型歌舞，好似曇花一現咁。」Eason說罷已知講錯說話，即補充說：「我唔係講我嘅事業，只係個騷個rundown啫。」Eason笑言不怕生意外，皆因下盤夠穩重，他笑說：「我唔會冇理性咁跳嚟跳去，加上下盤咁穩重，唔怕意外。」
採訪、攝影：駱華齡