日本網股Livedoor被指違反證券條例，成系股票大散1成至2成，拖累日經指數急跌462點，再拖累埋港股，恒生指數下挫201點。Livedoor否認指控，如果證明清白，或者事件淡化，港股昨日跌得過度。
港股調整一下，清涼一下，都係好事。恒指同唔少大藍籌，9RSI早前上到80以上，點都要整固先至有力再上。??家跌啲，或者再跌多少，再上。可趁低買C輪。
建行C輪9978：建行（939）好穩定，全日高低相差4格，收2.95元，唔見5仙，啲C輪則普遍跌突咗。例如9978，按公式計理論跌幅係4.6仙，但就跌夠8.5仙，收39仙，跌幅18%。
買9978，除咗博跟番公式計算追番啲失地之外，當然希望正股上升帶番上。唔講正股升越昨日最高價，就當正股升番到舊價即3元，隻輪上番前日47.5仙個位，就已經執22%利錢。
中銀C輪9068：中銀（2388）跌25仙，C輪9068按公式計算，理論跌幅15仙，但實際跌21仙，又係跌突咗，值得博反彈。
隻輪6月杪到期，溢價2%，槓桿率16.7倍（有效10.4倍），引伸波幅17.3%，數據唔錯。9777亦係跌突咗，亦係博反彈之選，但交投冇9068咁活。
章盛