有人話中國官場現實，人走茶涼，在特區呢？人走咗可能好多人得到解放。好似董建華咁，一唔做特首，個大仔董立均就返去東方海外，打理家族航運生意，唔怕再俾人講。據知董公子暫時唔會喺上市公司任職，只會負責旗下船公司嘅業務發展，3月就返工；一於同細佬董立新拍住上，大佬搞船務，細佬負責國內地產業務，兄弟同心搵真銀。
董立均本來係港龍航空嘅業務總裁，啱啱辭咗職，預計做埋下個月。佢喺港龍已經做咗4年幾，之前做過Boom.com同美國聯合航空，最早期亦喺東方海外貨櫃做過5年，總之唔係海上航就係天上飛。
成件事最有趣嘅地方，係航空業界久不久就傳港龍行政總裁許漢忠有意辭職，由董立均頂上，點知最後走嘅係董公子，許漢忠就坐得穩穩陣陣。
華華覺得董建華都幾開通，肯畀個大仔喺外面四處闖，累積唔同行業嘅經驗先返去打理家族生意。佢細佬董立新一直都有幫東方海外打理國內地產業務，舊年5月重做埋上市公司執行董事。講開又講，董家呢幾位子女，一直都好低調，冇出位嘢，反映董生雖無治國之方，但齊家都幾掂。
雖然董建華兩個仔將會合力打理家族生意，但據聞，佢哋阿叔——即係東方海外主席董建成不會因此退下來，重有排做咁話，實行三叔姪齊齊搵大錢。
李華華