日網絡股Livedoor被調查消息，令日股昨日低開，但好快已經識得反彈，早市收市時已收復逾200點失地，並輕微倒升。
趙飛雲睇見日股早市扭跌為升，重以為Livedoor壞消息已被消化，於是吼位在0.42元買入20萬股中民燃氣（681）。
日股午市在11時30分重開，在16300水平橫行半個鐘後開始向下滑，但在港股早市收市前跌幅並不算大，趙飛雲和好多股友都不以為意。點知食完午飯望一望，日股收市竟大跌462點，即係話日股在尾市個半鐘大跌近400點。
港股午市全面裂口低開，逃生門欠奉，但好友總算底子厚，在15500水平力守，恒指最後收15576，跌201點，成交則增加至353億元。
日股要跌，港股要調整，大部份人一早預咗，但出現昨日咁嘅走勢，又好似陰濕些少，早排一路贏上嚟，現時冇揸重期指好倉及C輪當然問題不大，但近日才在高位追貨的投資者則難免捱一記悶棍。不過，外圍美、日股市走勢如非全面逆轉，港股回氣後，仍有望反覆向好，再挑戰萬六點。
港股午市大跌，新買入的中民燃氣亦跟隨回落，平收0.405元，由於趙飛雲在0.42元買入，帳面要輸3.7%。前日講過，中民燃氣的基本因素不俗，小注投機的是彩票概念，風險相對不大，可以0.39元作止蝕位繼續持有，博持有一頭半個月會有驚喜。
永樂宜兩手準備
倉內另一隻股票永樂（503），昨日跌0.075元或2.2%，收3.325元。永樂技術超買，昨借勢整固，但走勢相對仍硬朗，餘數5萬股改以3.175元作止賺位。
另方面，若回試3.20元守得穩，則會補回先前沽出的5萬股。
趙飛雲