有朋友同華華講，有褲王之稱嘅旭日企業（393）董事長楊釗（圖左），前幾日喺會展搞場齋菜，擺20幾圍款待一班法師，重向每名法師封一千元利是！粗略估計，成個活動連場費加埋齋菜同利是，大約要20萬至30萬元。華華朋友講，褲王間唔中都會搞呢啲齋宴，一年約有4至5次。
今年6月，曾蔭權見各界選委時，華華見楊釗同釋智慧大師都似乎特別投緣。除咗佢誠心向佛外，話說好耐之前，褲王喺生意上遇到阻滯，當時佢同自己講，若果佢今次可以度過難關，之後就會更加誠心供佛。後來佢真係度過咗，當然守承諾，並決定定期搞齋菜大宴法師。
華華個朋友又話，褲王做事都好君真，唔會淨係請嚟請去都係同一批法師，盡量做到每個佛教團體都有份。