中原噚日搞精英會迎新大會，透露舊年做到一百六十八萬生意，促成八十宗成交，即係話，今年夠資格加入精英會嘅前線，有二百八十三人，創歷年新高。
喺一眾精英中，有個攞到鑽石銀獅，二十四個攞到鑽石銀鷹。中原集團主席施永青好自豪咁話，啲客見到呢隻鷹，「零舍醒神」啲。
不過，施老闆致辭時語帶感慨話，𠵱家競爭，某程度走向「劣行排擠良行」，好似打交、欺詐及出術呢啲行為，變成主流，認為咁樣落去，最後對行業發展不利。不過，老施補充，喺有轉變之前，都會照顧同事嘅現實情況。
施永青讚內地分行做得比香港好，因為員工學歷好，又識包裝。
唔知中原精英會係咪事先收到風，噚日請到前港姐張瑪莉，講「專業形象贏取顧客心」，從儀容、社交及餐桌禮儀，令客戶留下好印象，其間又舉咗好多實用例子，贏得全場掌聲。