章子怡雖然失意金球影后，但以穿衣品味來看，時裝設計師鄧達智認為她昨日以一身青檸色Armani晚裝作戰衣，足以力壓一眾荷李活女星，成為bestofthebest，完全穿出了荷李活女星的功架。其他最佳衣着女星人選，鄧達智認為身懷六甲的姬妮芙柏露（GwynethPaltrow）穿上大熱白色的高腰晚裝，是一個十分聰明的選擇，將她的個人味道毫無保留地發揮出來。另外在大量以白色晚裝作戰衣的女星中，姬蒂碧金素爾（KateBeckinsale）亦分數極高，低胸小魚尾的設計令她的美好身材表露無遺。
最佳衣着
姬拉麗莉煥然一新
評語：「Vintage晚裝一向都係紅地氈最突出嘅選擇之一，當年茱莉亞羅拔絲着Valentinovintage晚裝就靚得無人匹敵，姬拉麗莉（KeiraKnightley）着嘅亦係Valentino嘅vintage，條裙設計其實幾老氣，好在佢夠後生，令條晚裝有一份煥然一新嘅生氣。」
章子怡閃亮出眾
評語：「喺一堆外籍女星中，佢最有利嘅條件係膚色骨架唔同，而呢個差異亦成功令佢成為金球獎中最閃亮出眾嘅一人，直情係bestofthebest，多數女星噚日都着貼身晚裝，佢就着條大波浪嘅晚裝，首飾又唔累贅，如果可以set個精緻嘅omega復古髮型，就真係唔止一百分，呢個look佢完全着出荷李活女星嘅功架。」
菲莉絲蒂優雅突出
評語：「出爐劇情組影后菲莉絲蒂夏夫曼（FelicityHuffman）呢條Marchesa白色綴水晶晚裝，好典型外籍女星出席大場面嘅衣着，基本上出得呢啲場合，靚唔難，難在要喺眾星中成為最outstanding嘅一個，菲莉絲成功着出晚裝嘅優雅氣質，唯一就唔係最sharp嗰個啫！」
姬妮芙柏露醒目孕婦
評語：「睇過姬妮芙柏露喺電影《芳心愛漫遊》後，發覺真係冇人着empireline會靚過佢，佢𠵱家大住肚，竟然識得揀件Balenciaga嘅empireline晚裝，係一個非常smart嘅選擇，有時鬥靚淨係同自己鬥就得啦！」
姬蒂碧金素爾復古貴氣
評語：「金球獎着白衫嘅女星特別多，的而且確白色係今個春夏最hit嘅顏色，姬蒂碧金素爾着咗件有少少復古風格嘅ChristianDior晚裝，成件晚裝設計好的骰骨子，喱士粗肩帶、低胸裙尾有兩層小魚尾，好高貴優雅，要喺呢啲場合着得出一份矜貴氣質就實在唔易。」
最差衣着
彭美拉巨胸如石膏
評語：「論最差衣着，一定有彭美拉安德遜（PamelaAnderson）份啦，反正佢着得靚都唔會有人讚，佢呢身打扮，個招牌巨胸好似隻打咗石膏嘅手咁，好搞笑，真係純粹娛樂大家。」
莎拉謝茜嘉柏嘉臃腫失色
評語：「莎拉謝茜嘉柏嘉（SarahJessicaParker）出道以嚟都有高人幫佢打點，基本上未見佢失色過，但係噚日佢着條款式好穩陣嘅Rochas晚裝，就竟然有啲出事，着得佢有啲腫，冇晒平日嘅風釆。」
採訪：梁錦貞
