港股連升多日之後，昨日跌番200點，原因係受日股勁跌影響。
由於大市之前升得太勁，現時出現回吐好正常，小初覺得先調整一下，對後市利多弊少。
大市雖然下跌，但好多股份只係略受影響，好快就拗腰回升。好似廣東鬧油荒，中石化冠德（934）借勢炒高，晏晝一度跟隨大市回落，但臨近收市又再掃上，收1.71元，升15.54％，再創新高。
銀河開車撞正跌市
至於濠賭股方面，早排借消息炒上的新濠（200）同信德（242）隨大市回落，但最唔抵都係銀河娛樂（027），隻股剛剛公布同大股東修訂一批廿幾億元票據的terms，諗住可以益吓公司，令盤數睇落靚啲，可惜撞正日股拖累港股下跌，否則點都會有啲表現。
銀河昨日最低見4.875元，收報5元，跌2.91％，成交股數534萬股，金額2666萬元。
慕容小初