去年正式加入樂壇的周麗淇珍藏了很多紀念物品，視之如珠如寶，當中包括其處女唱片、幸運水晶鏈、親自撰寫兼畫插畫的書籍，以及奧運乒乓球雙打銀牌得主高禮澤和李靜親筆簽名的乒乓球拍，不過最彌足珍貴的，是一位歌迷被她責備後痛改前非，而送給她的大口仔咕𠱸。周麗淇表示fans明白道理，令她最感覺安慰。
改前非大口仔
我歌迷會嘅會長有一段時間好曳，畀我知道佢同其他歌手嘅fans鬧交，其實佢平時好少咁樣，我知道後好唔開心，唔明佢點解突然間咁唔成熟，跟住我就好嬲咁鬧佢。佢知錯後，就送咗支花同呢個大口仔畀我，花我就留唔到，但呢個公仔就成日陪住我，我瞓覺都攬住佢㗎。我覺得呢份禮物有意義過平時歌迷送嘅嘢。我𠵱家知道要多啲了解歌迷，見佢做錯嘢要提醒佢。
自寫自畫文集
呢次係我第一次寫書，估唔到比出碟重快，平時我好鍾意寫嘢，亦寫過雜誌嘅專欄，形式好似自己訪問自己咁樣。後尾有人睇到覺得幾得意，就幫我出咗呢本書，入面嘅插畫重係自己畫㖭。公仔睇落係咪有啲低能呀？哈哈，最初寫嘅時候，我重猛咁諗以前讀書時候學過嘅嘢，但最後都係隨心將感受寫出嚟。
儍更更處女碟
呢個係我第一個BB，記得出碟前真係好緊張，緊張到內分泌失調咗一個月呀。嗰段時間，我好似儍咗咁，電話響當咗係鬧鐘，鬧鐘響就以為係電話，猛拎起嚟喂喂喂。唔係話因為出碟好開心而攞嚟留念，而係紀念嗰段時間，加上呢隻碟係公司同工作人員嘅努力，梗係我寶貝之一啦，我嗰日重特登留喺公司，等啲唱片返嚟，然後拎起第一隻。
好運來水晶鏈
好多人覺得水晶好好，最初我唔信，但有次朋友送咗條磁石鏈畀我，話對健康好，所以我戴住佢。戴咗又真係好似少咗病痛，跟住愈來愈多朋友送其他水晶鏈畀我，幫助財運、人緣同姻緣咁囉，咁有理冇理都戴住晒，我唔畀人掂㗎，無可奈何先畀女助手拎一陣。
乒乓孖寶球拍
雖然我唔係特別鍾意打乒乓波，但有次喺活動上見到奧運選手高禮澤同李靜，重同佢哋打咗一場友誼賽，當然係佢哋讓我畀我贏啦。佢哋好友善、好有毅力，咁叻仔喺奧運成績咁好，令我好崇拜佢哋。活動完咗後，見有咁多人搵佢哋簽名，我都忍唔住走去買塊乒乓波拍，搵佢哋簽名。𠵱家塊拍同個波我都唔會拆開，原封不動擺喺屋企。
採訪：王連連
攝影：林德雄
化妝：NaviLam
髮型：CoenCheang@Hair
服裝提供：Marijuana
