立法會工商事務委員會噚日開會，請來工商局常秘D姐俞宗怡滙報世貿會議情況。大部份議員都讚政府處事有方，會以委員會名義寫信畀政府，表揚有關部門；上立法會被人「丙」係正常，俾人讚？講都冇人信。
議員唯一唔多滿意嘅係會議內容宣傳不足，話傳媒報道比較弱，被示威新聞蓋晒。D姐似乎深明傳媒運作，佢話可能世貿自由貿易嘅主題屬概念性，較枯燥，傳媒認為對銷路或收視無幫助，所以過去政府舉辦多次大規模相關研討會，傳媒都很少報道。
梁君彥對傳媒表現就話「遺憾」；照佢講香港係自由貿易最大擁護者，但傳媒未有積極宣揚；好似佢哋做紡織業嘅，受到配額限制，深深體會自由貿易嘅可貴。既然梁議員咁遺憾，不如自己買份報紙玩吓，反正有人放盤，咁就可以日日宣傳世貿，睇下有冇讀者畀6蚊買。