禮賓府被老董冷落多時，噚日卒之名正言順，成為特首官邸兼辦公室，以後煲呔無論開工定休息，都會喺禮賓府內度過，所以開張大吉之日，都要攞個好意頭先得，咁啱搬入去特首辦嘅員工有三十八位，三八三八，即係生生發發，絕對係一個靚數。
承襲肥彭 地牢開會
以後煲呔會喺禮賓府地下辦公，而地牢都有職員坐鎮。當然樓上係私人重地，閨房地帶，閒人免進。
唔好以為喺地牢辦公開會好刻薄，事關肥彭時代都係咁，唔係煲呔首創。新聞組同事就特別啲，喺禮賓府入口側邊大樓做嘢，嗰度原本係員工宿舍，專為特首辦而改建。
噚日返工嘅同事都話感覺唔錯，尤其嗰度有個大花園，人都爽朗啲，不過食lunch就麻煩咗，要多行幾步。好多局長噚日喺府內開完早禱會都笑笑口，可能都覺得嗰度景致怡人啩。
八方請教過風水師李丞責，佢話上禮拜四唔係好日，宜開山、斬草同動土，但不宜搬遷，煲呔嗰日開始搬屋唔多吉利；好彩噚日係好日，吉星拱照，辦公室開張冇乜問題。
李師傅睇過禮賓府風水話，間府邸個布局，本來承接咗奇力山同歌賦山嘅龍脈，可惜自從中銀總部大樓嗰把劍棟喺度之後，風水就大受破壞，所以老董都怕怕。
座駕撞車 陳羿傷腳
講開又講，煲呔進駐禮賓府首日座駕就撞車；得力助手小Donald陳羿踢波又跌跛腳，噚日要請半日假，會唔會同禮賓府嘅風水有關呢？
李師傅話應該無關，反而係煲呔命格問題，因為四四年出生嘅煲呔，踏入新春後就會受到坎卦主宰，坎係陷入嘅意思，即煲呔來年勢必陷入重重危機；家陣係冬春節氣交替嘅時期，危機自然開始應驗。
特首辦有新竇，但人腳重未齊，至少新聞統籌專員未到位。八方聽聞政治記者出身嘅何安達Andy已經應承接棒，𠵱家做緊securitycheck，應該農曆年前會有宣布，Andy新年後可以返新工。
呢位禮賓府新主人，政改之後好忌民生嘢再出事，怕影響政途，所以東鐵出事大鬧冬冬。
有人同八方講，煲呔越心急，處事就越嚟越似戴咗煲呔嘅董建華。有公務員就笑笑口話，內部有時叫煲呔做BTT，即BowtieTsang；但查實Tsang換上Tung字一樣得，叫煲呔醒醒定定，以免步老董後塵喎。
爆料熱線：29290000、27860099
報料傳真：26239278
報料電郵：[email protected]