銅鑼灣海威大廈一個過百萬豪裝嘅放盤，由年逾八十嘅老婆婆，一筆過以七百八十萬買入，單位千六呎，每呎近四千九。 中原鄭莉莉話，豪氣婆婆係區內老街坊，自從仔女嫁娶後，佢獨居喺四百呎單位，雖然班仔女都喺同區置業，不過，獨居多年嘅婆婆，始終希望與兒孫一齊住。 早排開始物色單位，見海威間隔裝修合心水，即時拍板，單位夠大，啲兒孫都會搬埋入去住，婆婆得圓三代同堂夢。