滑蓋式手機都係唔少人嘅心頭好，所以近年有唔少手機都採用上滑蓋式設計，其中最落力又最肯花心思都要數三星，一貫採用嘅滑蓋式無天線設計，幾乎已成為三星手機嘅招標之一，最近曾經得過獎嘅D500C後繼機E880水貨新返落場，報價$2,380，兼玩180°彈彈鏡，影人自拍皆咁爽！
記者：許福合 攝影：黃子偉
近排唔少手機都搶住喺新年前推出，所以先達到場水機經常有新Model，不過唔係價錢貴到飛起，就係功能一般嘅學生手機，E880一般估計賣$3,000以上，誰知落場都只係以$2,380開賣，都算係近期人氣最盛機種之一。
180°任轉鏡頭
雖然手機最基本功能係講電話，不過多數人買機，首個關心嘅都唔係電話方面功能，而係問影相有幾勁，有幾靚，要鬥相片解像度，E880都只係中規中矩，內置一個130萬像素鏡頭，以今時今日標準，只可算勉強接受，不過好玩在鏡頭可以任扭唔嬲，即使只係單鏡頭設計，不過仍然可以做到影人同自拍，秘密就在於機身左邊鏡頭掣「CameraRotation」，只要向上一推，鏡頭就會隨即反向機背，作為影人影景之用，當想玩吓自拍相，又可將鏡頭拉回，呢個設計可以令鏡頭180°前後任轉任影，毋須2個鏡頭，慳水慳力，鏡頭旁邊重有埋閃燈設計，夜晚影相都可以應付。不過要留意係每次將鏡頭反轉，都要用家手動將畫面自行倒轉，否則拍出來相片就會左右掉轉，相比同類機都有自動倒轉畫面功能，E880呢方面明顯要失分喇！
滑蓋推得穩陣
E880採用滑蓋式無天線設計，可能會覺得熟口熟面，其實基本上繼承D500C設計，D500C曾得過法國3GSM「2005全球最佳GSM手機」獎，新機喺優良基礎下外形有唔錯發揮；收起鍵盤後，長度約一張八達通，機身重88g，放得落衫袋兼好輕巧。最搶眼係1.8吋26萬色芒，論顏色同光度都係上上之選，最正係同鏡頭好夾，影相時畫面可緊貼目標，算爽快！筆者最怕滑蓋式機身搞到半桶水，大力啲都驚飛脫，喺此機身上就無呢個擔憂，推蓋過程非常順暢，而且感覺穩陣。
內置90MB儲存
E880影相靚之餘，拍片部份都唔錯，最高可以拍到352×288嘅MPEG4短片，用家又可以抄歌入去聽同支援MP3鈴聲，咁大量多媒體檔案當然會好食位，此機雖然無插卡，不過本身就內置咗90MB記憶，一般嚟講都好夠用。講到操作介面，都係最傳統9格設計，不過用落仍然覺得好UserFriendly，首先十字掣設計良好，配合操作反應夠快，完全無要等嘅感覺！另外出廠就內置咗多個JAVA遊戲，雖然LoadGame時間頗長，一隻計埋要15秒左右，不過以跟機嘅聲畫都算唔錯。
暗位測試
PROFILE
制式：GSM900/1800/1900
體積：87×43×23mm
重量：88g
屏幕：1.8吋26萬色TFT
主要功能：130萬像素鏡頭連閃燈、音樂播放器、90MB可用記憶、藍芽、MP3鈴聲、MPEG4拍片
查詢：T-OneMobile（26289090）旺角先達廣場地下G60號舖