有線旗下驕陽電影噚日為新戲《跟蹤》（暫名）舉行開鏡拜神儀式，有份演出嘅任達華、梁家輝同林雪齊齊出席，但就估唔到簽咗無綫經理人兼演員合約嘅徐子珊都現身喎。
問徐子珊接拍有線嘅電影，唔怕公司唔高興咩？徐子珊就話係無綫批准佢拍嘅，佢話：「合約嘅嘢交畀公司處理，今次公司都覺得機會難得，所以咪畀我接囉。」
謝絕有線訪問
問徐子珊究竟無綫有冇定下規條，例如唔准做有線訪問？徐子珊話公司叫佢乖乖哋準時返工，之後就尷尷尬尬咁話：「訪問暫時就唔得。」喺片中，子珊飾演刑事情報科警察，同上司任達華一齊跟蹤大賊梁家輝。
套戲其實邵美琪亦有份演出，但可能怕被追問舊愛鄭伊健同梁詠琪分手嘅嘢，所以冇嚟到，電影公司解釋邵美琪戲份少，唔需要去開鏡。