膽小又嬌縱<br>薛凱琪人肉大寶一見妥貼

膽小又嬌縱
薛凱琪人肉大寶一見妥貼

薛凱琪的五件珍藏品都是傍身必備,除了其他人送的手鏈和頸鏈等身外物,唱片公司宣傳大員Carmen是最重要的活寶貝。過去兩年Carmen悉心照顧薛凱琪,薛凱琪拍攝無綫劇集《學警雄心》時,因未習慣拍劇苦況,有次Carmen到外景場地探班,薛凱琪一見對方便嘩一聲流出兩行熱淚,恍如重遇親人。

共患難好戰友

「大家稱Carmen為公司promoter(宣傳人員),佢重係一個好照顧我、教我好多嘢嘅promoter。做歌手冇人教就幾好都冇用。」在旁的Carmen聞言即搭嘴說:「佢答得衰唔係我教佢。」薛凱琪大笑後又說:「之前Carmen陪埋我去斯里蘭卡探訪,我哋一齊烏低身用水喉洗頭,大家克服過好多難題。」

護身經文頸鏈

「條鏈係化妝師Jessica送畀我嘅聖誕禮物,吊住個牌刻住Prayer,另一個牌刻咗啲基督教嘅經文。Jessica知我成日要出埠做嘢,又驚鬼,成日要啲女仔同房陪我,佢送呢個牌,係想神與我同在,咁就唔會驚。我經常戴住,感覺安全啲。」

iPod靜音耳機

「部機同headphone幾個月前買嘅,個耳機可以cut晒啲雜聲,出面乜嘢聲都聽唔到,直情係借咗聾耳陳隻耳。iPod對我超級重要,冇咗佢實發癲,因為裝晒啲歌曲demo喺入面,出台前聽歌、練習都係靠佢。我又鍾意聽吓歌嘅,有時我喺屋企都會聽。」

長戴嘜頭手鏈

「我日日都戴住呢條手鏈,係爸爸送畀我嘅禮物,戴咗都超過半年,特別之處係戴得唔除得,要除嘅話,除非剪爛佢。我覺得呢條手鏈好似警察用嚟捉賊嘅手銬,但條鏈好幼、好細,長期戴住都OK,係我嘅trademark(商標)。」

救鼻涕蟲紙巾

「呢包紙巾喺美國買,見包裝個公仔幾得意咪買囉。我有嚴重鼻敏感,成日要攞廁紙抹鼻,買紙巾最好揀啲質地柔軟嘅,咁會好啲。有鼻敏感好慘,長期擤到個鼻結晒痂,有時要鏡頭就一就。」
採訪:朱倬誼
攝影:葉君海
化妝:JessicaChan
髮型:JoLaw/Mike@ILCOPLO
服裝:Zucca
場地:ONEBAR

護身經文頸鏈

iPod靜音耳機

長戴嘜頭手鏈

救鼻涕蟲紙巾

救鼻涕蟲紙巾