對旺角啲Cafe一向無好感，感覺Hea多過歎咖啡，好多時重煙霧彌漫，坐多陣都見頭暈，所以當我一發現「查理布朗咖啡專門店」時，誇張啲講有久旱逢甘露的感覺，形象健康堅持全店禁煙不特止，咖啡同食物水準重非常唔錯，最重要係SnoopyFans終於有個地方聚腳，大把成年人拖埋一家大細齊撐。去Cafe？肯定唔再係後生仔女專利！
記者：陳慧茵 攝影：陳智良
新店處身Cafe大廈
「查理布朗咖啡專門店」開正喺有「Cafe大廈」之稱的登打士廣場，全座大廈大大話話有十幾間Cafe，問老闆Elise點解揀受歡迎程度略遜的CharlieBrown而唔揀Snoopy做Cafe主角，佢話：「一來我最鍾意CharlieBrown同Woodstock，二來Cafe始終係成年人去嘅地方，用比較成熟的Charlie做主角更加合適。由細到大，我一家人都好鍾意Snoopy，發覺香港無乜真係坐得舒舒服服嘅Cafe，所以決定同哥哥夾份投資開業，淨係同美國傾專營權，已經用咗我2年時間。」
鮮奶咖啡CaffeLatte中$26
Fans最冧杯面上的卡通人物樣，面層朱古力粉用法國名牌Valrhona，估唔到細節都咁考究喎，一般而言，Latte會配CharlieBrown，但都可以隨自己喜好揀咖啡配卡通人物樣，只要預先同收銀姐姐講聲就得嘞，要整Cutie圖案喺咖啡面原來唔難，只要喺特別訂製的空心卡通人物亞加力膠上，輕輕灑上朱古力粉就得。
芒果乳酪芝士餅$28Mochafrappa大$35
終於輪到Sally登場，Homemade白朱古力倒模成Sally頭，墊住佢的芝士餅，芝士味不太濃夠Light，芒果甜而不酸，不過硬係覺得一啖吞咗Sally個頭落肚有啲殘忍啫；至於加咗Cream（加$3）同咖啡點子（即Jelly，加$5）的Mocha就更有咬口，你重可以隨個人喜好加雪糕（加$20）同糖漿（加$3）。
查理窩夫$28
靚到簡直唔捨得放入口，窩夫質感鬆軟帶香濃蛋味，伴士多啤梨及芒果果醬，加上可愛的心形形狀，食完感覺超幸福，鍾意的話重可以配朱古力醬㖭。
目標開20間分店
Cafe尚在試業階段，全店有8折優惠，Elise話：「目標係開20間分店，未來希望可以喺內地同澳門都有分店，無論去到邊都可以見到Charlie。」要睇一間Cafe辦得有無誠意，試一杯咖啡就知，如果基本到連咖啡都做唔好，食物幾有水準都無意思，呢度啲咖啡全部用意大利名牌Barbera咖啡豆磨製，Cake亦賣相精緻，糕點部總廚Michael之前喺富豪酒店工作，整餅年資有12年，夠膽講，同區無Cafe比得上。
海鮮墨魚汁麵$46
唔鍾意食甜嘢或者勁肚餓，可以揀每日供應的3款意粉，推介海鮮墨魚汁麵，大大隻蝦加埋以鮮墨魚汁煮成的麵條，好味到減緊肥都要同朋友過嚟試試。
（前）查理芝士餅$28
白咖啡朱古力慕絲$18
芝士餅面層朱古力加芝士，中間係原味芝士加Darkberry，底層就係朱古力餅底，不過講多都無謂，最緊要有CharlieBrown陪食。
Cafe必影靚位
迪士尼好似愈嚟愈無話題，不如轉移陣地嚟呢度影靚相喇，Elise話：「好多大人都會帶埋小朋友嚟呢度影相，有時見到佢哋唔捨得飲咖啡上面嘅公仔圖案，提供到一個重拾童真嘅地方畀佢哋，我自己都感動埋一份呀。」
食客有Say
應份順手牽羊
一場嚟到無理由空手而回，唔使怕醜喎，出聲攞番一兩件紀念品走喇，人人都係咁，店員唔會詐型㗎。
查理布朗咖啡專門店（23888202）
地址：旺角登打士街43H號登打士廣場2樓
營業時間：星期日至四11:00am-12:00mn，星期五及六11:00am-2:00am
座位：約45個
