電盈3G終於殺到，當用家睇見廣告嘅第一時間，就係即刻致電或上網登記！有人激冧近10,000分鐘嘅任傾時間，亦有人好想免費試玩3G上網，但講到尾，似乎唔多人對嗰部3G手機U636太有興趣喎！
部機本身功能唔弱，內置130萬像素相機，又可以插卡聽歌，表現唔遜色過任何一款同級機。不過，前兩日筆者路經PCCW，赫然見呢部免費試用半年嘅U636，門市竟然標價$3,688！個價咁「勁」，筆者即時問咗幾位街坊意見，大多數人都認為太貴，如果唔係免費，根本唔會考慮；另外，有街坊話就算半年後繼續用PCCW個Plan，都好大機會轉用另一款3G機。其實港人一直崇尚日貨，對國內牌子不感興趣，亦不難理解嘅！
文：尹謹基